25B17M
السلام عليكم والرحمه عزيزات الروح وحبيبات گلبي ويا أحلى صدفة جمعني بيها هالمكان. 🤍🦋
يمكن هاي آخر مرة أكتب بيها الجن وآخر وداعية أتركها إلجن لأن قررت أبتعد وأعتزل هالمكان وأخلي وراي كل اللحظات الحلوة والذكريات اللي عشتها وياجن
ما أعرف إذا چنت شخص عابر بحياة كل وحدة منجن، او تركت أثر حلو ولو بسيط، بس اللي أعرفه إن كل كلمة حلوة گلتها وكل محبة عبرت بيها چانت طالعة من نص گلبي بصدق، وما چان وراها غير المحبة الجن
أتمنى أكون صاحبة أثر طيب يم كل وحدة منجن وأتمنى من أجي على بالجن بيوم، تتذكرن مني كلمة حلوة أو موقف لطيف أو دعوة صادقة لأن مثل متعرفن«وإنما الإنسان أثر»، وأني كل اللي أريده أترك أثر حلو بگلب كل من عرفني حتى لو الأيام أخذتني بعيد عنهم. 🤍
يمكن مو كل مكان يشبهنا ومو كل شعور نكدر نفسره، وأحياناً الإنسان يحس إن الوقت اجه حتى ينسحب بهدوء من دون عتب ولا لوم ويحتفظ بالذكريات الحلوة ويمشي
حبيباتي القريبات من گلبي، عزيزات الروح اللي حبيتهن بصدق أتمنى الجن من گلبي كل الخير والسعادة وراحة البال والله يحفظجن وين متكونن ويرزقجن السعادة وراحه البال ولا يحرمني من ذكرياتجن الطيبة، وإن فرّقتنا الأيام، تبقن بذاكرتي وجوه وأرواح عزيزة علي
سامحني إذا بيوم قصرت، أو بدرت مني كلمه ضايقت وحدة منجن من دون قصد يشهد الله إنو اني ما تمنيت لواحدة منجن غير الخير.
راح أفتقد سوالفنا وضحكاتنا وتجمعاتنا بين الفقرات، وراح تبقى إلي ذكريات أعتز بيها، مهما طال الغياب.
تصبحن على نَظرة من الإمام الحُجّة عجّل الله فرجه الشريف. 🦋✨
وقبل نومجن، سلّمن على إمام زمانجن، ولا تنسن الباقيات الصالحات:
سبحان الله.
الحمد لله.
لا إله إلا الله.
الله أكبر.
لا حول ولا قوة إلا بالله.
سبحان الله العظيم.
سبحان الله وبحمده.
أستغفر الله وأتوب إليه.
اللهم صلِّ على محمد وآل محمد.
أستودعجن الرحمٰن الذي لا تضيع ودائعه، وأسأل الله أن يحفظ قلوبجن من كل حزن، ويرزقكن أيام تشبه نقاء أرواحجن.
هنا تنتهي حكاية وجودي بينجن، بس أتمنى يبقى مني أثر طيب، وذكرى حلوة، ودعوة صادقة ما تنقطع.
في أمان الله وحفظه، عزيزات الروح. 🤍🦋
